Молитва Преподобному отцу схимонаху Иоасафу, Печерскому

О, великий подвижниче благочестия, Преподобне Отче Иоасафе, миру явивый образ послушания, кротости и смирения, веры нелицемерной и пути истиннаго, еже в заповедех Христовых ходити и Ангельскому житию подражати! О, усердный трудниче нивы Христовой, плод сторичный стяжавый, имже обогатися земля Нижегородская в просвещение Светом Христовой Истины и укрепление веры Православной!
Днесь, светло празднуя память твою, богомудре Отче, и предстоя рацее святой, в нейже покоятся нетленныя мощи твои, восхваляем и славим тя, понеже многими труды стяжал еси от Господа велию милость душ и телес благодатнаго исцеления всех, с верою припадающих к святым твоим мощам. Сего ради и ныне, немощьми духовными и телесными обремененные, молим тя, Преподобне Отче, мы, грешнии и недостойнии: имея дерзновение ко Господу, вознеси о нас свои многомощные молитвы, да ими испросиши Земле нашея в вере Православной утверждение; людем христианским в духовном возрастании преспеяние; в превременнем сем житии благоденствие с Божиим поспешением; и в жизни вечной грехов оставление и душ наших спасение.
Буди нам, Отче Преподобне Иоасафе, добрый наставник и защититель, непрестай вознося теплыя молитвы твоя о всех, с верою и надеждою просящих твоей помощи и молитвеннаго ходатайства пред Господом, Ему же подобает всякая слава, честь и поклонение Отцу и Сыну и Святому Духу ныне, и присно, и во веки веков. Аминь.

04.03.2005